Pontevedra

Esta é unha actividade dun día de duración.

A xornada comeza coa chegada ante a Capela de San Roque, onde o grupo se reúne coas guías para comezar o percorrido a pé polo centro da cidade. A visita realízase polo centro histórico e a Alameda, con especial atención ás actuacións de peonalización e recuperación do patrimonio que contribuíron á súa posta en valor. Visitaranse as ruínas do Convento de Santo Domingo, a Basílica de Santa María A Maior, coa subida á torre do campanario, o Campiño de Santa María, onde se conservan restos da antiga muralla medieval, e o Mercado de Abastos. O itinerario complétase cun percorrido polas principais prazas e espazos emblemáticos do casco histórico. Seguidamente, o alumnado realizará unha visita guiada ao Museo de Pontevedra para coñecer a súa historia, os diferentes edificios que integran o complexo museístico e as principais coleccións que conserva e exhibe. Despois, o grupo dirixirase á praza e Santuario da Virxe Peregrina e, tras o xantar nos arredores da Praza da Ferrería, regresará á Capela de San Roque, onde o autobús o levará ao Centro de Investigación Forestal e Xardín Botánico de Lourizán. A xornada remata cun percorrido guiado polo Xardín Botánico e o CIF de Lourizán.